喺五四運動前後,有唔少年輕人都選擇出國留學,响1919年更加有位54歲嘅媽媽葛健豪,同埋仔女蔡和森同蔡暢一齊遠赴法國留學,佢被當時西方輿論稱為「驚人的婦人」。

葛健豪1865年出生於湘鄉,係中國早期女權活動嘅先驅,同秋瑾、唐群英被合稱為「瀟湘三女傑」。佢早年同革命派嘅秋瑾有唔少交往,對嶄新思維有所接觸。喺1914年,葛健豪阻止丈夫將只有10歲嘅女兒蔡暢賣俾財主做童養媳,於是叫仔仔蔡和森帶走蔡暢去到長沙讀書,後來講緊五十歲嘅葛健豪帶埋大女蔡慶熙、外孫女劉昂去到長沙讀書,三代人一齊求學成為當時佳話。

後來,葛健豪創立咗湘鄉第二女子職業學校,兼任校長同教導主任,鼓勵學生放足、留短髮,提倡婦女自立自強,反對封建包辦婚姻。喺1919年12月,佢喺蔡和森鼓勵之下,連同蔡暢三人一齊去法國留學。葛健豪入讀當地嘅女子公學,苦練法文,期間佢發現中國嘅刺繡喺法國好值錢,於是响夜晚密密開工,賣錢幫補家計,除咗仔女嘅日常開支,有剩嘅錢仲會資助其他人。據講,周恩來同鄧小平等人喺法國留學嘅時候,都曾經受過葛健豪嘅照顧,非常尊敬葛健豪。

圖片為1919年中國學生出發法國留學前合照、葛健豪,取自網絡。