今日係二戰盟軍發動諾曼第登陸75週年，喺1944年6月6日，盟軍派出15.6萬名士兵、2萬架載具，兵分多路登陸當時由納粹德國佔領嘅法國北部，並且成功建立陣地，為光復法國、擊敗德國鋪路，而呢場戰役亦被視為盟軍扭轉局勢嘅一場重要戰役！

盟軍當日喺天未光就開始向法國沿岸投放超過5000噸炸彈，並派出空降部隊空降德軍防綫後面，英軍嘅第六空降師成功攻佔珀伽索斯橋。盟軍喺日出同潮退之後展開登陸行動，美軍分別喺猶他同奧馬哈海灘登陸，而英軍同加拿大軍就搶攻黃金、朱諾同寶劍海灘。

盟軍行動成功亦要多得納粹德軍嘅誤判，當時德軍最高統帥已經預料盟軍會登陸法國，但內部就對登陸地區有爭議，希特拉同陸軍將領認為係响加萊地區登陸，而海軍就覺得係諾曼第登陸可能性更高。盟軍當時嘅欺敵措施收到成效，令德軍錯誤認定盟軍會喺加萊地區登陸，最終導致部署錯誤，再加上德軍指揮官隆美爾誤信盟軍唔會喺呢個時候登陸，居然返咗去柏林同老婆慶祝生日，令佢無法喺第一線指揮，錯失德軍反擊機會。

喺6月6日登陸呢一日，盟軍有多達4400名士兵死亡、9000人受傷或者失蹤，但呢場勝利令佢哋得以建立一個長達150公里嘅登陸場地同灘頭堡，奠定最終擊敗德軍嘅基礎。隆美爾稱，6月6日係「最長嘅一日」。

圖片為盟軍登陸奧馬哈海灘，取自網絡。