今日係端午節，除咗食糉之外，梗係要睇睇龍舟比賽應吓節喇，而今年香港嘅龍舟嘉年華就要等到下個禮拜五先有得睇。其實喺珠三角一帶，每逢端午節前後，廣東省各地都好似啱啱過去嘅廣州車陂龍舟賽咁「以船會友」，紛紛舉辦龍舟比賽。

講起龍舟比賽，廣東省內唔少城市嘅龍舟活動都唔一樣。就好似佛山順德有個龍舟說唱，始於乾隆年間，說唱藝人會一手揸住木雕小龍舟長棍，掛住鑼鼓，穿街過巷咁賣唱。而說唱嘅曲目改編自木魚書，詞嘅內容主要係神話故事，或者藝人自編自唱，範圍相當廣泛且別具特色。著名嘅龍舟說唱曲目包括《八仙賀壽》、《昭君和番》、《三聘孔明》等。

又例如江門市開平嘅龍舟，整龍舟所用嘅木材唔怕水但就怕日曬，所以平時唔用果陣就會將隻龍舟收埋喺河道入面。到咗端午節前夕，當地人再將龍舟掹出嚟清洗乾淨、維修，呢個儀式就叫做「起龍」。喺農曆五月初一，開平人就會同龍舟「結契」，然後上契嘅鄉鎮會輪流做東，邀請附近嘅龍舟作客，大擺「龍舟飯」，宴請各路鄉親，又獨特又熱鬧。 

今年深圳搞咗個「2019年龍舟文化藝術節活動」，有成16隊公開隊伍參賽，雲集深圳、香港、澳門、美國、英國、加拿大、菲律賓等地嘅健兒，比賽去到今個月尾，相當有睇頭。大家有興趣嘅，不妨行遠小小約埋三五知己去趁吓熱鬧。

圖為開平龍舟結契情形，原圖嚟自網絡。