最近林志玲結婚,加上無綫套《白色強人》出街,令阿史諗起十幾年前台灣拍過一套叫《白色巨塔》嘅醫療劇,連秘書妹妹都話自己當年有追開,唔使問佢肯定係為咗睇言承旭。其實唔止台灣,日本都拍過《白色巨塔》,台灣嘅《白色巨塔》改編自作家侯文詠嘅同名小說,以國立聯合大學教學醫院作為背景,講述醫療界嘅政治生態,由言承旭、張鈞甯、戴立忍,以及香港人熟悉嘅吳孟達做主角。

當年台灣《白色巨塔》嘅拍攝非常專業、場景質感拍得非常真實,言承旭同張鈞甯飾演年輕、有熱誠嘅醫生,一方面保留咗一啲青澀感,但另一方面亦不失醫生嘅專業。而吳孟達飾演非常資深嘅外科主任,脾氣暴躁、驕橫跋扈,營造出嗰種壓迫力,不過最後佢响權鬥中敗北,經歷中風、失勢等慘況,吳孟達演繹各種面貌時都非常出色。

其實當年言承旭要同吳孟達等前輩齊齊拍劇,搞到心情好緊張,佢試過放工之後去咗吳孟達住嘅酒店房,請教演技。而吳孟達覺得言承旭畀太大壓力自己,於是輕鬆啲同佢講,唔使叫「達叔」,叫「達哥」得喇。有報道講過,吳孟達嘅演技獲得同劇演員一致好評。

打到呢度,秘書妹妹突然問咗句,「做咩唔講埋《妙手仁心》?吳啟華同林保怡都好好戲」。雖然阿史過往已經出過《妙手仁心》post,但依然應承住秘書妹妹先,點解?仲有成疊claim單要報,各位明嘅。

圖為劇照,取自網絡。