呢排都天陰陰咁,啲雨落吓停吓好似落唔晒咁,喺47年前嘅6月18日,當時香港連續落咗3日大雨,導致多區發生山洪暴發、山泥傾瀉意外,造成合共156人死、117受傷,其中觀塘翠屏道同港島半山寶珊道發生嘅山泥傾瀉傷亡最慘重。其中一名被瓦礫活埋嘅居民,係後嚟成為終審法院非常任法官嘅列顯倫,佢當時全靠不斷唱歌,最終被救援員發現,奇蹟獲救。

早喺1972年6月16日,秀茂坪臨時安置區(俗稱雞寮)有居民發現屋前有泥土被沖落嚟,開始感到不安,並且報警求助,當局就叫附近地盤確保泥土唔好再下瀉,但都係無咩成效。6月18日中午,翠屏道開始水浸,無幾耐安置區北部山坡上嘅基堤開始有少量山泥瀉下。到咗1點左右,一段基堤崩塌,啲山泥就好似地氈咁瀉落嚟,淹沒70幾間木屋,過百名居民被活埋,造成71死52傷、數百人無家可歸。

同日夜晚大約9點,港島寶珊道亦發生山泥傾瀉,先沖毀一座2層高洋房,再沖冧干德道一座6層高樓宇,最後形成泥石流,沖毀位於旭龢道、12層高嘅旭龢大廈,成為香港至今全幢倒塌嘅最高層樓宇。當時旭龢大廈大部分住客未能及時逃生,造成67死19傷。而列顯倫被埋喺瓦礫下接近40呎,據講佢表現鎮定,不斷唱披頭四名曲「When I'm 64」,令救援人員憑歌聲鎖定位置,帶佢逃出生天。

原圖取自網絡。