清朝末代皇帝溥儀空有皇帝嘅虛名,但就無皇帝嘅實權,佢細個嘅時候連食飯嘅自由都無。據《我的前半生》所載,自從佢過繼俾光緒、同治之後,雖然有唔少「母親」,但就完全感受唔到母愛,當時主要都係裕隆太后(光緒嘅皇后)負責管教佢。裕隆對溥儀管得好嚴,溥儀細個就有胃病,佢6歲果年有次食栗子食得太多食滯咗,裕隆喺之後嘅個幾月就只准溥儀食米粥,搞到溥儀日日嗌肚餓都無人理。

有次溥儀出去玩,裕隆叫人準備饅頭等溥儀餵魚,點知餓仔底嘅溥儀將個饅頭塞落嘴醫肚,搞到裕隆對於溥儀飲食嘅規管更加嚴厲。後嚟溥儀恢復返正常飲食,不過都唔好得去邊,有一次佢連續食咗6個春餅,啲太監驚佢食滯,「發明」咗幫助消化嘅方法,就係叫兩個太監左右提起佢嘅兩臂,好似打樁咁將溥儀上下拉扯、深蹲。咁搞法,咪講話消化喇,分分鐘連食落去嘅嘢都嘔返晒出嚟。

而每逢溥儀心情唔好,發脾氣嘅時候,太監就會叫佢「唱一唱敗敗火」。所謂嘅「唱」,就係將溥儀反鎖喺間屋仔入面,任佢點叫、點喊、踢門、哀求都無人理,直到溥儀喊到攰先放佢返出嚟。不過原嚟呢種「敗火」方法唔單止溥儀試過,連佢嘅細佬妹都受過呢種待遇,可見出身皇家,唔一定係表面咁風光快活。

原圖嚟自網絡。