之前講開八國聯軍攻打北京,慈禧太后同光緒帝落荒而逃,不過根據《崇陵傳信錄》記載,光緒原本諗住自己留低响北京,同列強講和,趁呢個機會接管政權。不過慈禧都唔係善男信女,一早估到光緒嘅諗法,怕咁做會對自己不利,於是下令將建議光緒留低嘅珍妃塞入井浸死,再脅持光緒一齊逃走,結果光緒想留低嘅計劃徹底失敗。

珍妃出生於官宦之家,爸爸係禮部左侍郎,佢喺光緒十三年(1887年)入宮,好快就得到光緒嘅寵愛,而佢亦都好支持光緒嘅變法行動。喺戊戌變法失敗之後,珍妃被囚禁、禁止同光緒見面,到咗八國聯軍嗰陣,慈禧就命人將佢帶出,聲稱唔想佢受洋人侮辱,下令珍妃投井自盡,珍妃唔肯就由太監將佢塞入井浸死。而浸死珍妃嗰口井,現時就成為故宮嘅其中一個景點,不過有唔少人話,嗰口井唔係好大,質疑浸唔浸得死珍妃。

圖片取自網絡。