喺西安事變中起關鍵作用嘅張學良，同佢夫人趙一荻嘅故仔，阿史之前有介紹過，而今日要講嘅係張學良嘅原配夫人于鳳至。張學良花心，仲曾經自詡「平生無憾事，唯一愛女人」，面對多情嘅張學良，于鳳至就算同佢離咗婚，依然希望死後可以同前夫合葬，都咪話唔長情。

于鳳至嘅父親係北洋奉系首領張作霖嘅結拜兄弟，兩家關係密切，據講于鳳至細細個已經被風水先生批到有「鳳命」，張作霖嗱嗱聲就幫自己個仔定咗呢頭婚事。于鳳至大過張學良3歲，所以張學良一直都叫佢做「大姐」，但對於呢頭包辦婚姻，張學良唔係好滿意，佢貪玩多情，而于鳳至就係典型嘅賢妻良母。張學良同于鳳至婚後共育有4個仔女，于鳳至喺生第四胎嘅時候，患咗重病被中外醫師診治為不治之症。為咗等于鳳至死後，可以有人照顧張學良嘅4個仔女，兩家人就商量叫張學良娶咗于鳳至嘅侄女。張學良唔肯，話于鳳至雖然病重，但呢個時候結婚咁咪即係等同催佢去死？後嚟于鳳至大難不死，因為呢件事而好感動，從此對張學良更加放縱。

對於張學良嘅之後嘅夫人趙一荻，于鳳至亦好豁達咁接納佢，仲同張學良一齊叫佢做「小妹」。張學良喺西安事變後被囚禁，于鳳至就一直陪住佢輾轉各地，後來因為佢身體唔好，就由趙一荻嚟代替佢陪伴張學良。于鳳至對呢位「小三」唔單止無怨懟，更大方讚佢對張家有大功，于鳳至仲話張學良嘅事，自己都無條件支持，只要係對張學良有好處，叫佢死都得！有咁好嘅原配，張學良認真好福氣，不過于鳳至嘅遺願始終無實現，張學良最終都選擇咗同趙一荻同葬。

圖為張學良、于鳳至，原圖嚟自網絡。