暴露年齡問題,有無史友讀過常識科嘅前身社科健?阿史前幾日去咗南豐紗廠,睇《舊課本——那些美好的風景》展覽,入面展出唔少舊時嘅課本、海報、校服等等,展出嘅舊課本除咗中、英、數之外,仲有常識科前身嘅社、科、健其中兩科。喺1980年嘅社會科,就已經教小學生人口膨脹嘅問題,而健康教育就教小學生噪音對健康嘅影響。

展覽仲有一啲舊時嘅課室擺設,好似啲學生枱個櫃桶,有塊板可以拉起,自備鎖頭就可以將個櫃桶鎖起,放教科書、文具等等雜物。除此之外,亦有用嚟睇教育電視嘅電視櫃、體育堂用嚟放竹竿跨欄嘅細木樁、老師專用嘅粉筆套、粉擦、風紀帶等等。有興趣嘅史友,可以抽時間去南豐紗廠望吓,懷舊一番。