中國近代思想家兼教育家、同康有為一齊發起戊戌變法嘅維新派代表人物梁啟超,除咗主張變革之外,佢對仔女嘅教育亦相當上心,一方面佢秉承父親以「義理」同「名節」為立足之本嘅家風家教,強調道德修養、精神陶冶同人格培育,另一方面當時西風東漸,西方教育所提倡科學、民主、平等、自由、尊重個性、啟發式教育等等理念,亦影響梁啟超教育子女嘅理念,仲匯合中西方嘅特點添。

不過梁啟超同一般「嚴父」唔同,會經常流露出對仔女嘅愛,喺1898年至1928年間,佢寫咗超過300封信俾仔女,喺信中佢以「小寶貝」稱呼囡囡,又叫自己個仔做「白鼻」(baby),仲話「月光之下的我非常想念你們,我對着月亮唱歌」,內容非常肉麻。

梁啟超九個成年仔女各有所長,其中三個仔更加成為中央研究院院士或中國科學院院士,佢哋分別係大仔建築師梁思成、二仔考古學家梁思永同埋細仔火箭控制系統專家梁思禮。不過對於成功與否,梁啟超睇重嘅係態度,佢曾經寫信俾梁思成、梁思永,提到:「汝等能升級固善,不能亦不必憤懣,但問果能用功與否。若既竭吾才,則於心無愧;若緣殆荒所致,則是自暴自棄,非吾家佳子弟矣」,勸勉佢哋成功與否唔重要,最緊要係盡咗力問心無愧,唔好自暴自棄。而梁思成同梁思禮亦都認為,爸爸對佢哋嘅影響非常重要。

圖為梁啟超、梁思成、梁思永、梁思禮,取自網絡。