22年前嘅今日，香港回歸。咁大件事，當年中英雙方都預先準備充足，不過意料之外嘅係，英方嘅露天告別儀式撞正落大雨，搞到啲賓客無遮無掩，被逼淋住雨出席，部分人要中途離場換返件衫，咁究竟點解會揀呢個場地呢？

講返1997年6月30日嘅情況先，時任港督彭定康嘅三個女率先離開官邸，彭定康夫婦跟响後面，一家人上咗車之後，按照傳統架車會沿住港督府兜三個圈，象徵日後會再次踏足香港，不過根據資料，彭定康嘅座駕只係兜咗兩圈。

去到下午，港英政府舉行露天告別式，當時查理斯王子、英國首相貝理雅、前首相戴卓爾夫人等名人都有到場。不過嗰時落住大雨，唔少嘉賓所在嘅臨時看台都無上蓋，搞到佢哋非常狼狽，因為之後大部分人都會參加室內儀式，所以被逼半路中途離開去換衫，而怡和洋行嘅大班仲因為天雨路滑，跣親跌斷腳。

香港政壇元老級人馬鍾士元喺回憶錄記載，佢晚宴時同官員閒談，話英方告別式落大雨真係玩殘班賓客，對方話係英方堅持要响露天場地舉行儀式，覺得可以接待多啲賓客，不過中方望過天文台嘅記錄，嗰兩日落雨機會高，於是選擇响會展舉行交接儀式。

7月1日凌晨，英國國旗降下，中國國旗同香港區旗升起，正式代表香港回歸。