阿史有位朋友堪稱萬能，唱歌、跳舞、畫畫、書法瓣瓣掂，所以成日唔同展覽同演出。講開「瓣瓣掂」，問點解係用「瓣」呢個詞呢？咁就要由上世紀50、60年代嘅賭博「字花」講起，佢嘅玩法就係喺36個古人嘅名或物品入面押一個花題落注，每注派彩係一賠三十。可能係因為花冧盛放嘅時候會有好多花瓣（音扮），有人就會將嗰36個字花花題叫做「瓣」（音飯，係瓣嘅異讀字），好似「開邊瓣」咁，就係指字花會開出咩可能性咁解。

字花雖然已經走入歷史，但「瓣」呢個詞就流傳咗落嚟，變咗一個常用量詞，好似「衰邊瓣」、「瓣瓣掂」個「瓣」字就係指某個範疇，同「樣」嘅用法相似。

圖為字花花題，原圖嚟自網絡。