除咗包青天包拯之外，歷史上亦有其他好官被譽為「青天」，其中包括清朝嘅「于青天」于成龍，佢為官清廉，被康熙讚賞為「清官第一」，雖然佢官運唔錯，由七品縣令慢慢做到高位，但佢仍然過住簡樸生活。康熙二十三年（1684年），于成龍受命兼管兩地巡撫政事，無幾耐就去世，佢啲下屬檢視遺物嘅時候，就只發現一套官服同少少日常用品。而康熙亦破例為佢撰寫碑文，表彰佢廉潔刻苦嘅一生。

于成龍生於明代萬曆年間，喺順治十八年（1661年）先至獲任命為廣西羅城知縣，上任後致力抓捕強盜，令百姓安居樂業，另外佢又上書請求放寬徭役制度、興建學舍、創立養濟院，贏得好好嘅聲望，當時兩廣總督盧興祖等人以「政績卓異」為由，將佢推薦俾朝廷。其後于成龍先後升任做四川合州、湖廣黃岡嘅知州，亦取得唔錯嘅政績。

喺康熙十七年（1678年），于成龍出任福建按察使，當時有數千名百姓觸犯海禁，全部被判斬首，于成龍寫信俾康親王傑書，力爭重審，最後唔少百姓獲得釋放。于成龍又向無錢返去嘅百姓發放路費，得到大眾讚賞。兩年之後，于成龍升做直隸巡撫，而宣化遇到洪災，于成龍上奏請求免除田賦，並向朝廷請求賑災。另一方面，于成龍彈劾青縣知縣趙履謙，康熙當面讚佢「清官第一」。無幾耐，于成龍升任江南江西總督，但依然生活簡樸，每日粗茶淡飯，幾個月之後就改變晒江南民風。

圖為《于成龍》劇照，取自網絡。