喺周星馳套《鹿鼎記》入面，武功高強嘅馮錫範起初跟吳三桂「搵食」，意圖謀反，其後降清，成為康熙嘅得力助手。歷史上馮錫範真有其人，不過佢就同吳三桂無交集，反而係明鄭時期嘅重要人物。

馮錫範爸爸係馮澄世，係明鄭延平王鄭成功嘅官員。鄭成功死後，兒子鄭經繼位，而馮錫範出任鄭經嘅侍衛，立下唔少戰功，自此得到重用，成為明鄭主要將領，同陳永華、劉國軒合稱「台灣三傑」。喺鄭經去世後，原本應由監國鄭克臧繼位，但因為鄭克臧為人剛毅果決，得罪咗唔少人，馮錫範同鄭氏宗室都唔係好妥佢。於是馮錫範1680年聯同鄭經細佬鄭哲順，發動東寧之變，將鄭克臧絞死，又以董太妃令，立鄭經二子鄭克塽為延平王，馮錫範藉此獨攬軍政大權。

到咗1683年，清軍喺澎湖海戰大勝明鄭水師，馮錫範勸鄭克塽降清，獲封忠誠伯爵，隸屬漢軍正白旗。

圖為《鹿鼎記2神龍教》劇照，取自網絡。