阿史之前講「玄武門之變」嘅時候,有唔少史友都話「歷史係由勝利者書寫嘅」。的確,其實一直以來都有唔少人提出,話事件主角之一嘅太子李建成,喺建國路上嘅表現其實一啲都唔差,阿史今日就喺度分享吓相關說法。根據唐高祖李淵身邊記室參軍溫大雅所寫嘅《大唐創業起居注》,其實李建成同細佬李世民討伐隋室嘅戰功,可以話係不相伯仲。

據講,早喺李淵喺太原起兵之前,李建成就喺河東生活,並且負責廣招賢能。响公元617年,李淵帶同李建成、李世民,率兵向隋朝首都大興城(即係長安)進軍,期間遇上河西守軍,喺李建成同李世民合作之下,迅速擊敗河西守軍,戰後李淵封李建成為隴西公、左領軍大都督,又封李世民為敦煌公、右領軍大都督。直至攻克大興城,二人一路都係通力合作,戰功不分高低。

618年李淵稱帝之後,封李建成為太子、李世民為秦王。李建成負責喺北面防範突厥來犯,以及兼顧國內政務,而李世民就負責平定各地割據勢力,李世民喺平定多個割據勢力之後,光芒逐漸蓋過李建成,而李世民亦開始不滿屈居李建成之下,最終關係勢成水火,李世民發動玄武門之變,射殺李建成,三日後獲封為皇太子,同年登基稱帝。

圖為《大唐雙龍傳》劇照,取自網絡。