大家比較熟悉嘅名句「人生若只如初見，何事秋風悲畫扇」，其實係出自「清初第一詞人」嘅納蘭性德嘅手筆。納蘭性德係康熙重臣納蘭明珠嘅大仔，作詞了得，因才華出眾又善騎射，深得康熙喜愛，獲授三等侍衛，長伴康熙左右。照計應該官運亨通嘅納蘭性德偏偏淡泊名利，仲要英年早逝，之前有套電視劇《寂寞空庭春欲晚》講納蘭性德同表妹衞琳琅曾有過一段情，後嚟衞琳琅入咗宮成為康熙妃子，於是有咗段複雜嘅三角關係。咁究竟响歷史上，納蘭性德同康熙給妃子係咪真係有染？

睇返納蘭性德嘅情史，佢一共娶咗兩任妻子，仲有一房妾侍。納蘭嘅第一任妻子係兩廣總督盧興祖嘅女，兩人婚後相當恩愛，可惜紅顏薄命，盧氏婚後三年就因難產而死。盧氏嘅死對納蘭性德嘅打擊好大，佢嘅唔少代表作都係寫俾亡妻嘅悼念詞。喺之後相當長嘅日子裡面，納蘭依然沉浸喺喪妻之痛中，大概喺佢30歲嘅時候，納蘭同當時嘅才女沈宛情投意合，點知今次輪到納蘭性德早逝。

至於戲入面嘅表妹衞氏响現實中連影都無，康熙後宮的而且確有過一個姓衛嘅妃子，佢就係八阿哥胤禩嘅生母良妃。但納蘭同良妃肯定唔會有染，因為凡係皇帝以外嘅男人敢同後宮妃嬪眉來眼去，絕對係大罪。所以大家煲劇還煲劇，要識得分辨劇情同史實呀。

圖為納蘭性德像同《寂寞空庭春欲晚》劇照，原圖嚟自網絡。