上次講起「辮子將軍」張勳喺1916年搞咗場復辟鬧劇,短短12日就結束。呢場鬧劇除咗嚟得快、去得快,仲鬧出唔少笑話。話說張勳响當日凌晨,率領一班包括康有為在內嘅滿清官員入宮,向末代皇帝溥儀行大禮,同日溥儀發布即位詔書,宣布「臨朝聽政,收回大權」,隨即又為多名復辟支持者加官晉爵,其中立下「大功」嘅張勳,就獲授為議政大臣兼直隸總督、北洋大臣,以及封為忠勇親王。

至於康有為,就只獲封弼德院副院長一職。據講,當時佢希望溥儀再度臨朝之後,自己可以出任首揆(首席內閣大學士)。當時張勳向溥儀請示,點知瑾太妃斷言拒絕,原因係清朝嘅首席內閣大學士全部都有鬍鬚,康有為無,自然唔啱。其實康有為專登剃晒啲鬚,係為咗入京時掩人耳目,點知因為咁而無得做首揆,搞到非常失落。

原圖取自網絡。