近排又返睇電影《唐伯虎㸃秋香》，入面講到祝枝山賭錢輸晒成副身家不突止，仲要輸凸，怪唔得被周星馳飾演嘅唐伯虎話佢：「風吹雞蛋殼，財散人安樂」。好多人因為睇呢套戲先識呢句，所以唔少人都以為「風吹雞蛋殼，財散人安樂」係周星馳作出嚟嘅電影對白，但其實呢句出自古代一本兒童啓蒙經典《增廣賢文》。

《增廣賢文》嘅版本係「風吹雞蛋殼，財去人安樂」，仲有其他版本係「風吹鴨蛋殼，財去人安樂」，而「財散人安樂」應該係由廣東話演變而成。「風吹雞蛋殼，財散人安樂」意思係話雞蛋殼只係短暫保護雞蛋嘅保護罩，當人要食雞蛋嘅時候，蛋殼自然就失去佢嘅功能。而風只係將啲無用嘅殼吹走，人實際上無乜損失。錢財亦都一樣，係身外物，散盡咗反而更踏實，主要用嚟安慰人意外損失金錢嗰陣唔好太難過，有時錢多咗反而更煩惱。

圖為《唐伯虎㸃秋香》劇照，原圖嚟自網絡。