今日DSE放榜，希望各位應屆考生都可以收到張滿意嘅成績表喇。宜家嘅考試即使係自修生都可以報考，但明清科舉就必須要經學校先有資格參加，即係話考科舉之前仲要先考試進學，成為府、州、縣學同國子監嘅生員。

明清科舉採用鄉試、會試、殿試三級考試制，高中簡直係要過三關砍六將咁難。其中鄉試分三場，分別喺八月初九、十二、十五日舉行，一般九月會放榜；會試都有三場，考試方法同內容大概同鄉試相似；而殿試得一場，只要喺會試合格外加複試合格先有資格參加。為咗確保全國各地錄取嘅進士數量平均，明清進士考試仲分南、北、中卷或分省取錄。

我哋宜家考試入試場就要帶身份證同准考證嚟確認身份，其實舊時考科舉都要帶「准考證」㗎。不過，以前嘅准考證就叫浮票，係無相嘅，主要靠文字嚟大概描述吓考生嘅外形特徵咁，好似有無鬍鬚、身材中等定高挑等等。考試嗰陣，我哋宜家通常都一人一張枱櫈，但古時嘅科舉試場——貢院係無櫈坐嘅，得一個大概長167cm，寬133cm嘅細包間。考試期間，考生就要喺呢個包間搞掂答題、食飯、瞓覺、大小二便，生得太高分分鐘要捲埋個身嚟瞓，一啲都唔容易，所以咪講話高中喇，身體差啲嘅考生隨時捱唔過個考試。

圖為江南貢院，原圖嚟自網絡。