之前講過民國時期上海有位食腦商人黃楚九，賣「艾羅補腦汁」賣到出曬名。其實唔止賣補腦汁，黃楚九仲喺唔同項目創下多個「第一」，包括中國第一間屋企花園、第一間綜合娛樂場、遠東第一大遊樂場、中國第一間醫藥集團等等。佢做marketing極為大膽創新，响一百年前，佢已經識得用計仔响報紙頭版賣廣告，吸引大眾注意。

喺1917年嘅某一日，上海著名報章《申報》同《新聞報》頭版，得一隻大大嘅紅雞蛋，咩文字都無，讀者睇完都覺得一頭霧水，互相詢問咩事。到咗第二日個頭版就得一條小朋友嘅辮仔，第三日就有一個紮住辮、肥肥地嘅BB仔，去到第四日就見到呢個BB仔上面多咗個紅色標語「祝大家早生貴子」，啲讀者就好奇係邊個祝大家早生貴子。到咗第五日謎底先至揭曉，原來個廣告係黃楚九嘅大昌煙公司「小囝牌」香煙廣告，寫住「諸位歡喜吃紅蛋請吸最新出世的香煙  有紅蛋奉贈  祝諸位多子多孫」。

因為呢個廣告，令「小囝牌」香煙未面世就為人熟悉。一面世，就吸引唔少煙民去買，而煙盒內有一張煙畫，印住紅雞蛋同「恭喜」兩隻字，背面寫住可以憑券兩張去贈品處換紅蛋。黃楚九呢個宣傳手法，喺當時嚟講真係夠晒新奇！

圖為「小囝牌」香煙廣告，取自網絡。