阿史早排病咗去睇醫生，不過食完藥都唔見好，仲病多兩錢重，懷疑睇咗個蒙古大夫，唯有轉第二個醫生，認真當黑。講起蒙古大夫，點解會被當係庸醫嘅代名詞？唔通蒙古啲醫生真係好唔掂？其實「蒙古大夫」喺清朝係正骨技術高超嘅醫生，話說清朝嘅內務府有一個御馬監，係專門管理御用馬匹嘅機構，之後康熙年間先改名做上駟院。由於當時蒙古嘅正骨醫術高明，清廷選拔咗唔少蒙古大夫入上駟院。值得留意嘅係，蒙古大夫唔一定係蒙古人，而係泛指精於蒙古醫術嘅大夫。

講返點解蒙古醫生要被編入上駟院先，話說清朝係馬背上得嘅江山，每次打仗，啲戰馬都會有損耗，而蒙古大夫最叻正骨，醫馬非常拿手，所以蒙古大夫又叫做獸醫。而自從清朝建立之後，少咗戰爭，蒙古大夫醫馬之餘都會幫人正吓骨，醫吓骨傷之類，有啲似宜家嘅跌打醫生。亦因為咁，「蒙古大夫」雖然醫術高超、識得醫人，但叫佢哋醫人始終都無一般大夫咁專，咪被人當做庸醫、獸醫囉。

原圖嚟自網絡。