好耐無响TVB拍劇嘅歐陽震華,早排客串咗兩集《愛•回家之開心速遞》,歐陽震華喺入面仲以當年《金裝四大才子》嘅祝枝山造型演出,反應相當唔錯。講起《金裝四大才子》,係歐陽震華嘅經典作之一,當年佢同翁虹飾演嘅石榴姐係歡喜冤家,大放笑彈,兩人嘅感情戲簡直係全劇嘅點睛之筆。

阿史印象最深刻係歐陽震華同石榴姐初初相識嗰陣鬥食辣,嗰幕超好笑,講到歐陽震華食到滿頭大汗、成對孖潤腸出晒嚟,對面石榴姐依然食到面不改容,額頭一滴汗都無。點解?皆因石榴姐天生無味覺,食幾辣都無感覺,歐陽震華同石榴鬥食辣就實輸硬喇!

呢齣2000年播出嘅《金裝四大才子》,係TVB罕見嘅長篇古裝連續劇,成套戲共52集,播足兩個幾月,但劇情緊湊,情節輕鬆,一啲都唔會悶。劇情吸引之外,演員陣容亦星光熠熠,有一眾好戲之人好似歐陽震華、張家輝、林家棟、魏駿傑、盧海鵬、馬蹄露、成奎安、許紹雄等,加埋靚女花旦關詠荷、陳松伶、翁虹、文頌嫻、向海嵐、康華等演員,真係無得輸。連宜家嘅當家小生花旦馬國明同楊怡,喺呢套戲度都只係客串,可見呢齣劇嘅演員陣容有幾把炮。

圖為《金裝四大才子》同《愛•回家之開心速遞》劇照,原圖嚟自網絡。