唔知大家平時睇古裝劇嗰陣有無留意到，唔少商家，通常係賣酒嘅地方，都會喺鋪頭出面掛支旗仔，類似宜家周街見到嘅廣告招牌，咁究竟呢個習慣係幾時開始嘅呢？

唐朝非常流行掛旗仔，唐代詩人杜牧就曾經喺《江南春》寫到：「千里鶯啼綠映紅，水村山郭酒旗風」，所以好多人都認為掛旗呢個習慣係由唐朝開始。有傳說話，係因為唐太宗當年幫襯咗長安一間飯店，入面個大廚廚藝好了得，唐太宗食到舐舐脷，跟住返去就整咗幾支旗仔賞俾間飯店。皇帝賞賜喎，梗係要掛出鋪做生招牌喇，於是其他鋪頭都爭相效仿，爭住掛旗仔出街賣廣告。

不過，其實喺唐代之前已經有商家識得用掛旗嚟做招徠，戰國時期著作《韓非子》就有記載：「宋人有沽酒者……懸幟甚高。」而掛嘅旗仔數量都有講究，掛一支嘅就係比較低級嘅店鋪，賣嘅嘢單一、簡單，例如煎餅、包、豆腐花之類。掛兩支旗嘅就高級小小，賣嘅食物種類較多。而掛四支旗就係最高級嘅，一般係高級酒樓，入面有得食山珍海味，仲可以承辦各種高級宴席添。

圖為《清明上河圖》局部及劇照，原圖嚟自網絡。