近排有位朋友同阿史講心事，話鄉下有位八十幾歲嘅親戚，老婆好多年前已經走咗，最近老人家突然好唔開心，原來佢諗住同同村嘅六十幾歲婆婆結婚，齊齊做伴過日子，點知啲村民唔理解，謠言傳到滿天飛不特質，伯伯仲被人話佢「臨老入花叢」，搞到兩位老人家都好唔開心，成班親戚幫手諗咗好耐，都唔知點收科。

其實「臨老入花叢」係貶義詞，顧名思義即係話人一大把年紀，依然對女色無抵抗力，而呢個詞最初嚟自明末短篇白話小說《二刻拍案驚奇》。本書第三十五卷講到有對後生姑嫂，睇中附近個後生仔，想叫賣糖嘅小廝幫手，撮合佢哋同呢個後生仔共度一宵。點知對面有個70幾歲嘅阿伯亦睇中呢對姑嫂，俾錢收買個賣糖小廝，夜晚冒認後生仔去姑嫂屋企，仲話自己「臨老入花叢，我之願也」。

到咗夜晚，色膽包天嘅阿伯假扮後生仔上門。姑嫂天太黑睇唔清人樣，放咗個布兜拉阿伯上樓，一拉上嚟見到居然係個阿伯，姑嫂兩人嚇到即刻收手，就咁一放手，阿伯就跌咗落樓，當場跌死。件事被阿伯屋企人發現咗，姑嫂二人最終上吊自殺，可見「臨老入花叢」係要付出代價嘅。

圖為《Party冇限耆》劇照，原圖嚟自網絡。