上次講起1949年4月，國民黨同共產黨嘅代表响北平（而家嘅北京）舉行過一場議和，但最終因為國民黨政府拒絕簽署《國內和平協定（最後修正案）》，令議和以失敗告終。代表國民黨同共產黨議和嘅，分別係西北軍政長官張治中同中央軍委副主席周恩來，但原來張治中同周恩來都有唔少淵源，甚至張治中之後被挽留喺北平，都同周恩來有莫大關係！

張治中同周恩來早喺國共第一次合作嘅時候相識，1925年國民黨建立黃埔軍校，國共兩黨分別派人到軍校擔任教職，當時周恩來出任政治部主任，而張治中就出任教育長，就係由嗰陣時開始二人開始接觸，並且成為摯友。二人喺黃埔軍校擔任教職期間，張治中不時都會去聽周恩來講課，張治中慢慢對共產黨嘅認識越來越深，再加上信任周恩來，於是佢曾經提出加入共產黨，但由於國共兩黨曾有協議，共產黨唔招攬國民黨高級幹部入黨，所以就唔成事。

其後因為兩黨鬥爭，張治中同周恩來之間嘅往來中斷差唔多10年，直至國共聯手抗日，二人先至重逢。抗日戰爭結束之後，國共舉行重慶談判，達成《雙十協定》，張治中協助周恩來說服蔣介石，釋放咗過百名共產黨黨員，又制定護送計劃將佢哋安全送到延安。

到咗1949年4月，張治中率領國民黨代表團去北平同以周恩來為首嘅共產黨代表議和，談判破裂之後，當時周恩來同共產黨方面極力遊說張治中留低，但張治中就有啲猶豫，認為應該返去覆命。周恩來於是安排黨員接走張治中喺南京嘅家屬，並送到北平，等張治中就可以無後顧之憂咁留低。喺新中國成立之後，成為總理嘅周恩來仍會抽時間同張治中相聚，而張治中亦曾經出任人大常委會副委員長、國防委員會副主席等要職。

圖為張治中、周恩來，取自網絡。