相信大家對「通勝」都唔會陌生，好多人屋企至少都有一本通勝嚟看門口，自從上年今日「通勝王」蔡伯勵過身之後，宜家嘅通勝就由蔡伯勵嘅仔女嚟繼承完成。其實早於2015年，為表揚蔡伯勵對保存傳統曆法嘅貢獻，特區政府已經頒發金紫荊勳章俾蔡伯勵，仲稱佢係「編纂曆法的權威」，而傳統曆法已經被納入香港首份非物質文化遺產名單。

蔡伯勵生於廣東順德，係以編纂曆法聞名嘅「真步堂」第三代傳人。雖然佢嘅爺爺蔡最白係天文曆法學家，但佢自細對風水堪輿都好排斥，只不過後嚟日軍侵華，蔡伯勵無得返學讀書，先聽從爸爸建議學吓天文曆法以便將來糊口。蔡伯勵22歲就開始接手家業，編纂《通勝》嘅曆法部分，之後更成為香港風水界大師，據講唔少富商、名人都指定要搵佢幫手睇風水。

原圖嚟自網絡。