阿史前嗰排睇到單新聞，話梵高當年用嚟自殺嘅手槍，經拍賣以超過140萬港元成交，真係誇張！嚟自荷蘭嘅偉大藝術家梵高喺1890年7月27日，响法國巴黎以北嘅一片田野向自己胸口開槍，但由於手槍火力細，梵高無即時死亡。受槍傷嘅佢拐吓拐吓咁返到旅館，旅館老闆發現到，梵高就展示傷勢，話「我整傷咗自己」，旅館老闆通知咗梵高細佬西奧，又搵醫生嚟為梵高急救。梵高最終响2日之後不治，終年37歲，而梵高最後嘅一句說話就係同西奧講「我想就咁死去」。不過梵高嘅死多年來都有人提出質疑，有人認為梵高唔係自殺，而係他殺？

有人提出他殺嘅理據，包括梵高生前最後一封寫俾西奧嘅信入面，提到自己心境平靜，另一方面梵高生前亦買咗一批新顏料同日用品，無留低遺書，亦無任何跡象顯示佢有負面情緒或者自殺傾向。喺2011年，兩位曾獲普立茲傳記文學獎嘅作家Steven Naifeh和Gregory White Smith，出版咗一本梵高嘅傳記，佢哋認為梵高係被兩個成日欺凌佢嘅細路誤殺，其中一個細路係當時只有16歲嘅Rene Secretan。不過Rene接受訪問嘅時候，雖然承認佢同哥哥有欺凌過梵高，但就否認有向梵高開槍，仲話係梵高偷走佢哋由旅館借返嚟嘅手槍自殺。

圖為梵高畫作及自畫像，取自網絡。