宜家嘅學生娛樂多咗，搞到唔少老師同家長都要出盡法寶先吸引到學生有興趣讀書，真係少啲腦汁都唔得。末代皇帝溥儀嘅娛樂節目可能無宜家咁豐富，但佢明顯對讀書興趣麻麻，所以英文老師、被稱為「蘇格蘭老夫子」嘅莊士敦唯有帶住厚厚嘅畫冊去上課，嚟引起溥儀興趣。

莊士敦嚟自英國，喺1919年正式成為溥儀嘅英文老師。莊士敦唔單止教溥儀英文，佢仲對呢個被廢黜嘅皇帝寄予厚望，一心想將溥儀培養成一個有紳士風度、有理想、有知識嘅人。所以，莊士敦喺教書之餘，亦會成日同溥儀講吓西方文化，不過溥儀似乎唔多感興趣，上堂成日分心。於是莊士敦開始帶埋畫冊上堂，主要都係啲歐洲社會嘅畫，亦有第一次世界大戰嘅相。

望住啲畫，溥儀終於肯坐定定聽書，莊士敦就同溥儀講吓英國王室生活，世界各國嘅國情、風光，中國內戰局勢等。喺莊士敦嘅影響下，溥儀變得嚮往西方文化，做咗好多被清朝遺老稱之為大逆不道嘅行為，例如喺皇宮裝電話；為咗踩單車命人除去門檻；剪咗清王室嘅重要象徵——辮子等。

圖為莊士敦同溥儀合照，原圖嚟自網絡。