美軍响1945年8月6日同9日，先後喺日本廣島同長崎投下共兩粒原子彈，迫使日本喺幾日之後投降，結束第二次世界大戰。唔講唔知，美國最初研究原子彈嘅budget只係得6000美元，到底係因乜解究？話說响1939年，德國成功進行原子分裂實驗，一班移居美國嘅科學家憂慮德國會搶先製造原子彈，於是就搵嚟當時世界著名嘅物理學家愛因斯坦寫信俾美國總統羅斯福，呼籲美國要盡快研製原子彈。不過當時軍方領導人就唔係好明原子彈到底係咩嚟，而羅斯福亦對此半信半疑，只係撥出6000美元研究，直至1941年12月發生珍珠港事件，先至令美國態度轉變。

珍珠港事件發生後，美國於1942年6月啟動研製原子彈計劃，由於總部係响紐約市曼哈頓區，所以呢個計劃就命名為「曼哈頓計劃」。計劃耗資20億美元，最終美國响1945年7月初研製出3粒原子彈，分別命名為「大男孩」、「小男孩」同「胖子」。當時新任嘅美國總統杜魯門，為咗借助咗原子彈提高美國地位，特登將原本7月1日舉行嘅波茨坦會議，推遲到7月17日舉行。

會議舉行之前，美國於7月16日朝早喺阿拉莫戈多沙漠進行試爆，「大男孩」爆炸之後，一個蘑菇雲升到上10000英尺上空，連用嚟試爆嘅30米高鐵塔，都因為高溫而瞬間蒸發。呢場試爆令成個美國西南部都感受到震動，美國為咗隱瞞，就訛稱係阿拉莫戈多軍事基地嘅彈藥庫發生爆炸。之後喺波茨坦會議上，《波茨坦公告》敦促日本無條件投降，警告如果唔投降，日本就會被「全部摧毀」。日本拒絕投降之後，杜魯門回國期間就下令向日本投擲原子彈，寫下二戰史重要一頁。

圖為經歷原爆嘅廣島，取自網絡。