前排睇咗日本影星木村拓哉同長澤正美拍嗰套《假面酒店》,令阿史諗起電視台2005年嗰套《酒店風雲》。套劇主要演員包括馬德鐘、郭可盈、吳卓羲、官恩娜、姜大偉同姚子羚等等,故事講述「皇廷酒店」創辦人王玉廷(劉丹飾演)有3個唔啱key嘅仔,分別係大仔王啟業(蔡子健飾演)、二仔王啟志(莫家堯飾演)同埋三仔王啟傑(吳卓羲飾演),王玉廷交通意外逝世之後,酒店繼承權好意外咁落咗喺外人高峰(馬德鐘飾演)手中,後來高峰仲呃埋王啟傑媽媽嘅股份。其後3兄弟團結一致,對付高峰,想拎返爸爸創辦嘅酒店,而另一方面3兄弟嘅舅父鄭永發(姜大偉飾演)亦都吼住酒店。劇集後期,3兄弟先發現高峰係受爸爸王玉廷所托,做「醜人」扮敵人令3兄弟團結、管理好酒店,最後仲聯手擊退鄭永發。

呢套劇以酒店作為背景,題材新穎,而且商戰味濃厚,劇情刺激,當年唔少人都追呢套劇。值得一提嘅係,吳卓羲主唱嘅《別怪她》係套劇嘅插曲,當年非常洗腦,連卡通《我們這一家》嘅媽媽花師奶都成日唱「別怪她」幾隻字,就知道首歌令觀眾幾咁難忘。而劇中嘅皇廷酒店,係取景自東莞太子酒店。

圖為劇集海報,取自網絡。