香港唔止孫中山嘅「第二個家鄉」,仲同佢嘅屋企人有不解之緣。1895年,廣州起義失敗,孫中山開始咗長達16年嘅海外流亡生活,而孫中山嘅屋企人亦都因此受牽連,孫氏一家大小翌年坐船投靠喺夏威夷發迹嘅孫中山哥哥孫眉。直至1907年,孫眉因土地權敗訴後破產,被迫結束經營多年嘅農場,攜家人朋友前往香港。

到咗香港之後,孫眉租咗粵劇名伶朱次伯父親喺九龍城東頭村24號嘅一間小屋居住。不過,孫眉一家喺香港嘅生活並唔安穩,先係1910年孫中山母親楊太夫人過身,葬於西貢蠔涌。兩個月之後,孫眉亦因為組織革命運動而被港英政府驅逐出境。而呢個驅逐令,直至1912年2月先被撤銷。

孫眉離開香港之後,輾轉前往檳城同孫中山會合,參加庇能會議,為之後嘅黃花崗起義策劃。至於孫中山嘅其他屋企人,有說法話係楊太夫人過世後離開香港,亦有話係孫眉被驅逐前後。

圖為孫家合照,原圖嚟自網絡。