夏天係蚊蟲滋生嘅旺季，住新界鄉郊地方嘅同事成日抱怨屋企嘅「細蚊仔」經常被細「蚊仔」咬，跟住又勾起秘書妹妹嘅好奇心喇。佢走嚟問阿史，點解小朋友又叫做細蚊仔嘅？係咪因為兩者都好嘈好煩？

雖然秘書妹妹嘅解釋好有創意，不過就唔係正解，「細蚊仔」應該寫做細氓崽，「氓」喺《說文解字》度係民眾咁解，而「崽」喺《方言》入面解做「子也」，所以細氓崽加埋就係指小朋友。亦有講法話，其實「細蚊仔」正寫係「細蠻子」。因為廣東附近地區喺古代被稱為南蠻，廣東人又叫做「南蠻子」，所以南蠻子嘅小朋友就叫做細蠻子，細紋仔嘅音亦由此演化而嚟。

無論係細蠻子定細氓崽都好，各位夏天都要做好防蚊措施，唔好被真正嘅細「蚊仔」咬呀。

原圖嚟自網絡。