前排新聞講起人民幣貶值，阿史諗起以前40年代中國就曾經經歷過嚴重貨幣貶值。話說40年代由抗戰中後期開始，國民政府統治區嘅貨幣──法幣，價值不斷下降、令通貨膨脹越來越快，抗戰勝利之後爆發國共內戰，令情況更加嚴重。喺1948年8月，國民政府總統蔣介石發布《財政經濟緊急處分令》，以及《金圓券發行辦法》等項規定，推行幣制改革，發行「金圓券」取代原本嘅法幣。

根據最初嘅規定，金圓券限額發行20億，法幣300萬元可以兌換1元金圓券，另外又禁止黃金、白銀同外幣流通，要求所有個人同法人將黃金、白銀同外幣兌換成金圓券，每兩黃金同白銀分別可以兌換到200元同3元金圓券，而1美元就可以兌換成4元金圓券。起初呢個政策都尚算順利，之不過隨住蔣介石兒子蔣經國喺上海「打虎」失敗、經濟管制失敗，國民政府通過《改善經濟管制補充辦法》，放棄限價政策，其後又取消金圓券發行限額。

喺1949年1月，就發行咗超過200億元金圓券，到咗3月就達到2,000億、5月達到68萬億，超過原先限額嘅3.4萬倍，導致金圓幣急速貶值，一石大米就要成幾億先買到。根據台灣財政部嘅歷史資料顯示，當年3月尾，學者顧頡嘅日記記載，上午一個銀圓價值13,000元金圓券，下午已飆升到17,000元；一個月後，居然可以兌換400萬元金圓券，絕對係天文數字。去到5月，物價繼續飛漲，唔少地方已經用返銀元、外幣、黃金以至實物等做交易，部分地區嘅金圓券更被視為廢紙。更慘嘅係，唔少民眾喺幣改初期就將啲錢換成金圓券，急速貶值之下令所有辛辛苦苦儲返嚟嘅財產付諸流水。

圖片為金圓券、1949年市民拎大疊錢出街，取自網絡。