唔知係咪因為古代人無乜娛樂，背書特別叻，成日都聽講有神童記憶力超好，背書倒背如流。而有清朝第一才子稱號嘅紀曉嵐都係神童，睇過嘅書過目不忘，佢仲曾經因為呢個技能，未問過乾隆皇帝就將唔少珍貴典籍丟落海？

話說紀曉嵐奉旨編纂《四庫全書》，有一次佢奉命去山東帶一批珍貴嘅秘本返京城。點知途中因為船隻過重同埋種種意外，導致船艙容量不足，不得不捨棄部分書籍。紀曉嵐於是漏夜揀書，將一啲無咁珍貴嘅書睇晒記低，再丟落河，搞到成萬卷嘅珍本剩返四分之一都唔夠。

乾隆知道後梗係好嬲，紀曉嵐就談定話自己已經將啲丟咗嘅書牢記於心，可以默晒出嚟。乾隆唔信，要紀曉嵐即場背出嚟，紀曉嵐真係開始背，背咗成個鐘都未背完。乾隆唔知佢背得啱唔啱，又求其搵咗本書叫紀曉嵐背，紀曉嵐又真係背得好流暢，一字不差。無辦法，啲書唔丟都丟咗，紀曉嵐又真係可以背得出，乾隆最後都赦免紀曉嵐丟書之罪。

圖為紀曉嵐畫像同《鐵齒銅牙紀曉嵐》劇照，原圖嚟自網絡。