之前有史友提到宜家熱播緊嘅《包青天再起風雲》,希望阿史講講相關歷史嘢。早排同大家介紹過歷史上嘅包拯做咗啲咩不畏強權嘅事跡,今次就講埋劇入面處處同包拯作對嘅大奸角——龐太師。不過令大家跌眼鏡嘅係,歷史上嘅龐太師唔奸不突止,對朝廷功勞唔比包拯少,仲好受百姓愛戴?中間係咪有啲咩誤會?

根據《宋史》所載,龐太師原名龐籍,山東成武人,進士及第而後入朝為官。宋仁宗時期,章惠太后參議軍國大事,龐籍認為不妥,當衆燒晒垂簾聽政禮制嘅文件,仲上奏勸皇上要親自處理國家事務,用人要識分辨忠奸,防止朝臣結黨營私,多啲聽吓大臣嘅意見,唔好俾執政大臣專權等。咁睇落,龐籍嘅建議都幾正路。

自從西夏開國之君元昊攻陷金明、承平等地後,邊境百姓幾乎被搶掠一空。龐籍到任後,喺山谷旁邊修築圍欄,多次招募百姓入嚟耕作,種出嚟嘅糧食作為軍需之用。喺龐籍駐守邊境期間,管治士兵非常嚴厲,當時宋兵雖然分散駐紮喺城中各處,但畏於龐籍,無人敢違法犯禁。不過對百姓,龐籍就頗為惠愛,民望亦不俗。照咁睇,龐太師真係被影視作品冤枉咗好耐喎。

圖為《包青天再起風雲》劇照,原圖嚟自網絡。