今日係美國麻省政府訂立嘅「廣州日」,用嚟紀念「中國皇后號」到達黃埔古港嘅日子。究竟美國同廣州有啲咩淵源,要特登定個「廣州日」?

清代一口通商時期,廣州係唯一一個對外通商嘅口岸。喺1784年2月,美國「中國皇后號」商船裝住西洋參、銀幣、煙鹼等貨物,由紐約港出發,歷經半年,終於喺同年今日到達廣州黃埔古港,成為美國第一隻開往中國嘅商船。售完所載貨物之後,「中國皇后號」又採購咗茶葉、布匹、瓷器、絲綢、肉桂等物品運返美國,轉運到紐約、費城等地銷售,中美貿易從此展開。

為咗紀念呢次歷史事件,2014年今日,麻省政府參、眾議院一致通過將今日定為「廣州日」,「中國皇后號」同與之相關嘅歷史都會被收藏喺博物館,寫入當地教科書。唔講唔知,美國第一代百萬富商亦都喺中美早期貿易時代誕生,美國商人約翰·顧盛喺廣州經商30年,累積咗60萬美元嘅資產,之後返美投資,生前財產達到240萬美元。

圖為「中國皇后號」抵達黃埔港油畫,原圖嚟自網絡。