田徑向來唔係亞洲人擅長嘅項目，而中國跨欄運動員劉翔就正正打破咗呢個舊有認知。2004年今日喺雅典奧運會上，劉翔以12秒91嘅成績取得110米跨欄冠軍，成為首位喺奧運男子田徑項目奪金嘅中國運動員，仲平咗英國選手哥連積遜嘅世界紀錄。

紀錄係用嚟打破同創造嘅，劉翔並無滿足於12秒91，喺兩年後嘅瑞士洛桑國際田聯超級大獎賽上面，劉翔唔單止再次衛冕，仲以12秒88嘅成績打破咗哥連積遜保持咗13年嘅世界紀錄。2007年，劉翔更喺大阪世界田徑錦標賽男子110米欄決賽奪冠，成為集奧運會冠軍、世錦賽冠軍同世界紀錄保持者於一身嘅男子110米欄大滿貫得主。接受採訪嘅時候，劉翔曾講過：「我要讓世界知道什麼是亞洲速度！」

不過，喺2008年嘅北京奧運會上，劉翔因右腳跟腱受傷，宣佈退賽。劉翔養傷3年之後復出，雖然獲得國際田聯鑽石聯賽上海站110米欄決賽嘅冠軍，但後嚟喺倫敦奧運會上，佢舊患復發，跨第一個欄時跌倒，最終只能夠用單腳跳過終點，止步於預賽。直到2015年4月，劉翔喺微博上正式宣佈退役，結束16年運動員生涯，揮別賽場。

圖為劉翔2004年雅典奧運比賽情形，原圖嚟自網絡。