乒乓比賽唔單止係一場競技,仲可以係緩解關係嘅契機。中美史上著名嘅「乒乓外交」,就係响之前提過嘅美國總統尼克遜任內發生,推動中美關係邁向正常化。唔講唔知,呢場「乒乓外交」其實係源自一個機緣巧合,到底係咩事?阿史今日同大家介紹吓。

話說响1971年3月底、4月初,日本名古屋舉行第31屆世界乒乓球錦標賽,當時中國代表隊同美國代表隊喺唔少場合碰面。喺4月4 日,美國選手科恩喺訓練場練完波之後搵唔到車,突然見到有架貼住錦標賽標誌嘅巴士駛過,就遞手截車。上到車之後,佢發覺成車都係中國選手,於是就企咗喺門口附近。呢個時候,中國選手莊則棟企起身走埋去科恩身邊,透過翻譯同科恩傾計,莊則棟向科恩表示,中國人民同美國人民一直都友好,好歡迎佢上車,仲送咗一面杭州織錦俾科恩。架巴士去到體育館門口,一班記者隨即趕到,呢一幕就成為各大報章嘅頭版。科恩之後亦都回禮,送咗件T恤俾莊則棟。

之後美國隊副領隊就好直接咁問中國隊負責人,會唔會有機會訪問中國,當時中國隊領隊就向國內請示,消息輾轉傳到毛澤東同周恩來等國家領導人嗰度,最終中方同意邀請美國隊到訪。尼克遜收到消息之後非常驚喜,隨即批准接受邀請。喺4月14日,周恩來於北京親自會見美國乒乓球運動員同埋隨行記者,仲話美國選手來訪「打開兩國人民友好往來的大門」。之後中國表明願意接待美國總統特使,甚至係總統本人到北京展開直接會談,促成1971年7月美國國家安全顧問基辛格、1972年尼克遜訪華。

圖為美國隊訪華、科恩同莊則棟合照,取自網絡。