「同學各位，找個位，這是你的開學禮」就嚟開學喇，每年到咗呢啲時候，阿史都會諗起首歌、回憶起以前返學嘅日子。其實首歌係2004年TVB電視劇《青出於藍》嘅主題曲，套劇可以話係TVB最經典嘅校園劇之一。

《青出於藍》由歐陽震華、陶大宇同郭可盈主演，歐陽震華飾演一位商界精英，但好唔情願咁被老細叫咗佢去做一間band 3學校做校長，扭轉學校校譽差、成績差、年年蝕錢嘅情況，歐陽震華個角色本身對教育無乜興趣，但隨住套劇發展亦慢慢變得有熱誠。至於陶大宇同郭可盈就飾演兩位老師，一齊擔任4A班班主任，佢哋三個就好努力咁教好學生、改善佢哋嘅成績。另外，劇中有周永恆、趙頌茹等等飾演反叛學生，演得入型入格，令成套戲拍得夠真，觀眾睇得投入。唔知各位史友有無遇過咩開學趣事？記得留言同大家分享吓~

圖為劇照，取自網絡。