尋日9月1日係第二次世界大戰爆發80週年,唔少領袖都去咗波蘭出席紀念活動,包括德國總統施泰因邁爾、德國總理默克爾、烏克蘭總統澤連斯基,以及美國副總統彭斯等等。施泰因邁爾出席活動時,譴責當年納粹德國向波蘭發動進攻,係出於「吞併野心」,又請求波蘭寬恕、原諒。話說响1939年9月1日,納粹德國空軍轟炸波蘭一個叫維隆嘅小鎮,數千名民眾死亡,目的就係喺造成大眾恐懼,2日之後波蘭盟友英國同法國就向德國宣戰,象徵第二次世界大戰全面爆發。

其實早喺1938年10月開始,納粹德國就曝露出侵略波蘭嘅野心,多次向波蘭提出領土要求,包括交出「波蘭走廊」同埋但澤(又稱格但斯克),但波蘭拒絕,於是納粹德國就決定突襲,諗住一舉殲滅波蘭。喺1939年8月31日晚,有一支著住波蘭軍裝嘅德國黨衛軍襲擊德國邊境嘅格萊維茨電台,仲直播用波蘭語辱罵德國,又留低幾具著住波蘭軍服嘅囚犯屍體,製造波蘭突襲德國嘅假象。之後德國各電台都報道波蘭突襲德國嘅消息,於是喺9月1日凌晨納粹德國就轟炸波蘭維隆、大舉入侵波蘭。

雖然英法兩國喺2日之後向德國宣戰,聲稱要履行保護波蘭嘅承諾,但就實際上就宣而不戰,喺納粹德軍進攻之下,波蘭嘅防綫迅速瓦解。外界估計二戰期間,波蘭有超過500萬人被殺,佔全國人口17%,當中包括300萬猶太人。

圖為被轟炸之後嘅維隆,取自網絡。