唔知係咪因為自古異性相吸嘅道理,男上司偏好女下屬,女上司就鍾意男下屬多啲(呢句係秘書妹妹講嘅)。而武后武則天對宰相狄仁傑亦好似特別唔同,成日親切咁稱呼狄仁傑做「國老」,而唔係叫佢個名。無論狄仁傑喺朝堂之上點樣同武則天大聲爭論,武則天通常都會聽從佢嘅意見。就連喺太子嘅人選上,武則天亦聽取狄仁傑嘅建議,立兒子李顯做太子。

喺好多影視作品裡面,狄仁傑都以神探嘅形象出現,而歷史上嘅佢,其實係個文韜武略嘅能臣。公元698年,武則天嘅侄仔多次游說武則天,爭取成為太子,而班大臣就勸武則天立自己個仔李顯做太子,真係你有你講,佢有佢講。呢個時候,狄仁傑就加把口,話親生母子始終比姑侄親,阿媽第時百年歸老嗰陣都有個仔供奉,反而從嚟就無聽過皇帝供奉姑姑嘅。武則天聽完之後,即刻召廬陵王李顯返嚟,立為皇嗣。

武則天好倚重狄仁傑,狄仁傑好幾次要告老還鄉,武則天都唔批。狄仁傑每次覲見武則天,武則天都免佢行禮下拜。一個女上司咁寵信男下屬,難怪後世唔少奇聞野史話武則天可能鍾意狄仁傑,但就被人正氣凜然咁拒絕咗。當然是真是假,就要等精明嘅大家自行判斷喇。

圖為狄仁傑畫像及武則天狄仁傑劇照,原圖嚟自網絡。