呢排多區有集會，部分警署附近更爆發警民衝突，包括近排受到大眾關注嘅旺角警署。其實旺角警署棟建築本身歷史悠久，佢前後搬咗兩次，最初並非位於目前嘅太子道西。第一間旺角警署位於旺角道海旁、喺1901年建成，到咗1925年就搬咗去彌敦道700號（而家嘅T.O.P商場），1964年再搬去太子道西142號嘅現址。目前大家所見嘅旺角警署始建於1923年，响1925年落成，起初用作警察訓練用途，1927年借俾拔萃男書院用過1年，到咗1964年旺角警署先至搬過嚟，並且由油麻地警署分署升格為獨立警署。响2009年，旺角警署獲確定為二級歷史建築。旺角警署唔單止棟建築物有豐富嘅歷史元素，佢亦都見證同經歷過部分香港重要事件。

第一次就係1952年嘅「三一事件」，喺1951年九龍東頭村發生大火，過萬人無家可歸，內地組織慰問團喺1952年3月1日來港，但港英政府派軍警阻止，有迎接慰問團嘅群眾同警方發生衝突，有群眾向警方掟石同燒車，防暴隊施放197粒催淚彈驅散群眾，而旺角警署被群眾掟石破壞，最後警方開咗3槍，事件中有1人喪命，過百人被捕。

另一次就係發生响1966年4月，市民當時抗議天星小輪加價，彌敦道由佐敦道至旺角道一帶有數千名群眾騷動，佢哋周圍叫囂破壞、擲硬物、放火燒車等，有商店遭到搶掠，而旺角警署亦被縱火。港督戴麟趾當時宣布宵禁，又派軍警開槍鎮壓，事件造成人命傷亡，超過1400人被捕。

圖為旺角警署，取自網絡。