最近香港有集會遊行，唔少記者親赴前線採訪，十分專業。其實唔單止21世紀，喺上世紀二十到四十年代，美國都曾經有一對記者夫婦——斯諾同海倫非常專業，奔走於香港、上海、武漢等地，報道中國革命同抗日戰爭嘅情況，可以話係見證住中國大時代嘅變遷。斯諾當年唔單止同著名作家魯迅、孫中山夫人宋慶齡有深厚友誼，更加喺香港落力籌錢，支援中國抗日。

美國記者斯諾自1928年到上海擔任英文周刊《密勒氏評論報》助理編輯後，就以旅行採訪形式踏遍神州大地，並結識咗同樣嚟自美國嘅記者海倫。兩人志同道合，好快結為夫婦。三十年代，兩人仲嚟過香港旅遊，並聽過英國名作家蕭伯納响香港大學嘅演講。兩公婆無幾耐之後定居北平（現今北京），採訪過唔少名人。1936年，斯諾想寫一本共產主義嘅書，於是靠好友宋慶齡嘅幫助下，去到陝西採訪共產黨人，成為首位深入革命根據地採訪嘅外國記者，編寫成著作《西行漫記》。

自從1937年蘆溝橋事變之後，抗日戰爭全面爆發，上海亦不能倖免，2000幾間工廠被摧毀，超過50萬工人失業。斯諾夫婦唔單止深入戰地前線採訪，向世界呈現戰爭實況，仲積極發展「工業合作運動」（簡稱工合），支援抗日戰爭。個運動主要係組織失業工人同難民去未被日軍破壞嘅地方，建立小型合作社繼續生產，從而成為抗戰嘅後援力量。

1938年，斯諾專程嚟香港，同孫中山遺孀宋慶齡磋商關於工合運動嘅發展。喺宋慶齡嘅支持下，「工合香港促進委員會」得以成立，成為發展工業、生產戰時必需品嘅重要後援。後嚟運動嘅國際委員會於香港成立，向海外華僑同團體展開募捐，令抗日根據地得到大批物資同捐款等不同形式嘅支持。斯諾居中牽線，可以話係中國抗日嘅重要後援。

原圖嚟自香港歷史博物館。