上次同大家講完旺角警署，今日繼續同大家講講最近同樣備受關注嘅深水埗警署。深水埗警署位於欽州街同荔枝角道交界，屬二級歷史建築，佢喺1925年落成，興建目的係為咗應對因大量大陸移民湧入所引起嘅治安問題。喺長沙灣警署建成之前，深水埗警署一直係附近一帶嘅總部，管轄範圍仲去到荃灣咁遠。

深水埗警署有三層高，係由著名建築師行巴馬丹拿嘅前身公和洋行建造，警署嘅外型古典，露台迴廊、中式金字瓦頂同煙囪、上海批盪外牆同地下兩翼圓拱形柱廊等都別具特色。喺日本侵佔香港時期，深水埗警署附近嘅軍營曾被日軍改做拘留營，而警署亦用作拘留營嘅指揮部。自1978年後，呢座超過90年歷史嘅警署就成為分區警署，宜家警署嘅大樓旁邊增設咗多座現代化建築物，以應付需要。

圖為深水埗警署，原圖嚟自網絡。