上次講開响1945年9月2日,日本代表登上美國軍艦「密蘇里號」向盟國投降,之後其他地方嘅日軍亦陸陸續續向盟國投降繳械,而中國戰區日軍嘅投降儀式就响7日之後,即係9月9日嘅早上,喺南京原中央軍校大禮堂舉行。

呢次受降儀式由中方代表、陸軍總司令何應欽主持,當日日方嘅中國派遣軍總司令岡村寧次,率領參謀長小林淺三郎、副參謀長今井武夫、參謀小笠原清、艦隊司令福田良三、台灣軍參謀長諫山春樹、第三十八軍參謀長三澤昌雄,及譯員木村辰男,一共8人出席。日本投降代表入場之後,先向何應欽鞠躬,再响何應欽示意之下就座。之後岡村寧次就喺投降書上簽署同蓋印,並交出佩刀,象徵投降。

受降儀式結束之後,何應欽向全國廣播,宣布日軍已經簽字投降,又形容係中國歷史上最有意義嘅一日,亦係八年抗戰艱苦奮鬥嘅結果。由9月11日開始,喺中國戰區嘅日軍分為16個區,陸續向中方繳械投降。

圖片取自網絡。