前兩日秘書妹妹行過土瓜灣嘅牛棚藝術村，之後問阿史條藝術村所在嘅馬頭角道，命名係同邊隻馬有關？阿史搲爆頭，查一查資料，先發現馬頭角道同附近馬頭涌道，都係以「馬頭」嚟命名，不過兩條街道都同馬頭無關係嘅，反而係同碼頭有關。

話說以前嘅碼頭喺文書入面係寫做「馬頭」嘅，而喺1898年界限街以北仲未劃入香港範圍之前，九龍城寨真係有一個叫做龍津嘅「馬頭」。龍津馬頭喺九龍灣海面，同啟德機場大樓頗近，當時仲未填海，海灣有一個凸出嘅海角，由於呢個海角近龍津馬頭，所以就叫做馬頭角。雖然宜家馬頭角附近已經被填滿，但呢區依然叫做馬頭角區，所以喺街道命名嗰陣仍沿用「馬頭角」。

至於馬頭涌道，當時真係一條涌嚟㗎。以前嘅九龍城寨外面都係農田，全靠一條喺新蒲崗流落嚟嘅涌灌溉，呢條就係馬頭涌喇。只不過因為後嚟要起啟德機場，馬頭涌被截斷，亦填平咗做道路，先變成宜家嘅馬頭涌道。

圖為九龍城寨前嘅龍津石橋同附近碼頭，原圖嚟自網絡。