好多香港人鍾意打邊爐，貪佢野食夠快熟，又熱辣辣。而打邊爐相傳喺西漢時期已經出現，但直至宋朝先有文獻記載。講開飲飲食食，清朝乾隆嘅「千叟宴」大家就聽得多喇，咁究竟「千叟宴」係食咩嘅呢？無錯，就係打邊爐喇。

所謂嘅「千叟宴」，其實就係敬老宴，始於康熙嘅60歲大壽，當時規定凡65歲以上長者，無論官民，都可以去紫禁城暢春園參加。乾隆繼位後，前後擺過兩次千叟宴，包括嘉慶元年嘅第二次千叟宴，當時赴宴者更多達6000人。由於出席人數眾多，千叟宴只能夠喺戶外擺，當時正值冬天，天氣寒冷，乾隆嘅寵臣和珅就提出打邊爐，大家可以邊食邊暖身。

呢個火鍋御宴嘅材料就豐富囉，珍饈野味，應有盡有，鹿肉片、飛龍脯（鳥類）、袍子脊、山雞片、魷魚卷、野豬肉、野鴨脯、野魚肉、刺龍牙（蔬菜）、大葉芹、刺五加（療效似人參）同豆苗，認真豐富。火鍋材料講究之外，就連宴會上用嘅醬料亦好特別，係滿族傳統、用韭菜花醃嘅醬。

除咗用嚟招呼人，乾隆自己亦好鍾意打邊爐，佢曾經喺一個月內試咗27種火鍋。不過，值得注意嘅係，以前嘅打邊爐同宜家嘅將餸菜放落滾水度淥熟嘅食法有啲唔同，反而比較似將食物放落鍋度「炆」，炆熟之後再一直熱住食。

圖為千叟宴情景畫，原圖嚟自網絡。