今日係中秋節，先祝各位中秋節快樂！講到中秋，又點可以少咗應節食品——月餅呢？某月餅牌子之前有個廣告都幾深入民心：「咪當人老餅，今年送XX冰皮月餅。」「老餅」通常指人思想守舊，有啲唔禮貌嘅仲直接用嚟指代老人家，究竟點解要用「餅」嚟形容人呢？咁就要由香港70年代講起。

話說喺上世紀70年代開始，香港唔少餅家都鍾意喺電視度賣廣告，宣傳自己嘅月餅產品。呢啲餅家都話自己出嘅月餅最歷史悠久、最傳統，因此佢哋亦會以「老餅家」自居。所以，「老餅家」就係老嘅、傳統嘅餅店。後嚟經過演變，「老餅」就有咗傳統、守舊嘅意思，亦用嚟指思想守舊嘅人。不過，用「老餅」嚟稱呼老人家係好唔禮貌嘅行為，大家千祈唔好亂用。

原圖嚟自網絡。