銅鑼灣伊利莎伯大廈多年前曾經發生花槽藏屍案，但兇手至今仍然在逃。話說喺1984年3月30日，警方接到該大廈高層住戶報案，表示成日聞到一啲難聞氣味，起初以為係海風吹嚟，但後嚟整理花槽時，發現臭味原來嚟自隔離單位個花槽，報案人除咗見到上面有染血布條，仲發現用嚟加高花槽嘅石屎滲出血水。警方大為緊張，搵埋消防去到個可疑單位。

鑿開花槽石屎之後，警方發現兩具用白布包住嘅屍體，兩人嘅手都被鐵鏈反綁，屍身已經嚴重腐爛同發脹。起初，因為死者身上無身份證明文件，令調查毫無頭緒。後嚟警方响花槽發現一張卡片，屬於新加坡福祿商品私人有限公司謝順丞，於是向當地通報。最後根據新加坡國防部嘅牙齒紀錄，證實兩名死者係新加坡富豪之子謝順發同謝順丞兄弟。

調查發現，謝順丞間公司嘅業務涉及黃金期貨，即「炒黃金」，客戶包括香港人及印尼人。根據報道，謝順丞發現生意蝕咗差唔多兩千萬港元，懷疑被人呃，於是2月底到香港，向一個印尼華僑追收爛賬，點知被人勒索返轉頭，要哥哥飛嚟香港營救。

後嚟謝家收到電話，話謝順發兄弟被綁架，當時爸爸謝美興按照匪徒指示，將贖金匯到香港，但兩個仔仍然慘被撕票。至於案發單位，租客係持印尼護照嘅Lim Bun Kia（譯名林賓佳），佢聲稱係嚟香港渡假，租屋兩個月，但所用嘅護照係偽造嘅，再加上間屋早喺案件揭發前2個月被租用，所以警方相信單案係有預謀，佈局非常周詳。警方曾經發拼圖通緝兇手，但始終捉唔到人，令呢件藏屍案成為懸案。