上次就講到民國新聞界「頭號角鬥士」、《京報》創辦人邵飄萍筆伐袁世凱稱帝，之後又激到國務總理段祺瑞生蝦咁跳。今日再繼續講埋邵飄萍同段祺瑞、奉系軍閥首領張作霖嘅恩怨。

1926年，北京各界民眾請願，抗議大沽口事件後八國使團對中國政府嘅最後通牒，點知就遭到段祺瑞政府暴力鎮壓，史稱「三一八」慘案。邵飄萍得知消息，即刻增派記者到現場，仲親自采訪有關方面嘅權威人士，翌日喺《京報》刊載報道《國民擁護國權大流血──八國通牒之大反響》，揭露段祺瑞政府曬還愛國群眾嘅真相。段祺瑞亦因此下台，退居天津。

跟住輪到張作霖接管北京政府，佢一掌權就即刻將邵飄萍列入黑名單，下令逮捕。兩人之間嘅牙齒印原嚟早喺1918年結落，緣起係邵飄萍撰寫過一篇報道《張作霖自由行動》，刻畫咗馬賊出身嘅張作霖將陸軍總長取而代之嘅嘴臉。邵飄萍之後喺《京報》發表大量張作霖嘅罪狀，搞到張作霖對佢又恨又怕，諗住出「銀彈策略」收買《京報》，點知邵飄萍唔受落，繼續向讀者揭露張作霖嘅秘密。

種種過節令張作霖對邵飄萍狠下殺心，張作霖於是收買咗邵飄萍嘅故交張翰舉，設局逮捕邵飄萍。張翰舉先打電話俾邵飄萍，引邵飄萍放下戒心，離開六國飯店返《京報》館處理報館事務。兩個鐘之後，邵飄萍就落入張作霖一早設好嘅陷阱，被捕入獄。就算社會各界發起營救邵飄萍行動，亦無法動搖張作霖嘅決定。最後，邵飄萍因「勾結赤俄，宣傳赤化」嘅罪名，秘密被判死刑。

圖為邵飄萍、張作霖，原圖嚟自網絡。